dala3.ahlamontada.com
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

dala3.ahlamontada.com

كلام عن الحب
 
الرئيسيةأحدث الصورالتسجيلدخول

 

 اكيد بتخرج مع الشله !!!!!!!!!!!!!!!!!!!!!!!!!!!!!!!!!!!

اذهب الى الأسفل 
3 مشترك
كاتب الموضوعرسالة
M ! DO




المساهمات : 37
تاريخ التسجيل : 06/08/2007
العمر : 34

اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Empty
مُساهمةموضوع: اكيد بتخرج مع الشله !!!!!!!!!!!!!!!!!!!!!!!!!!!!!!!!!!!   اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Icon_minitimeالثلاثاء أغسطس 07, 2007 3:38 am

أكيد أن كل منا له شلة من المقاطيع ,الذين لا هم لهم في الحياة, سوى إضاعة وقتك الثمين !
هذه الشلة لا تنشط إلا حين يكون وراك حاجات مهمة تعملها.. وقت الامتحانات مثلا.. عندك واجب.. متابع فيلم أو برنامج في التليفزيون..كده يعني ..!
ساعتها هاتلاقي تليفون جالك من واحد صاحبك بيقولك ان الشلة كلها مستنياك و احمد رجع من السفر مخصوص و انك واحشهم جدا و لازم يشوفوك.. أو – لو كان رزل- هاتلاقيه تحت بيتك قاعد يزمر و يعرّف المنطقة كلها إن الشلة في انتظار سيادتك و انك لازم تلبس و تنزل حالا...!
ساعتها هاتضطر للنزول مرغما - طبقا لمبدأ التدبيس – و تبدأ رحلة الترويش مع الشلة ...
الترويش مع الشلة هنا غالباً لن يخرج عن واحدة من الترويشات التالي ذكرها :




الترويشة الأولى: القهوة !

خروجة القهوة من أكثر أنواع شيوعا في عصرنا الحاضر.. تلاقي صحابك جم خطفوك من البيت عشان تروح تقعد معاهم على القهوة ..
في القهوة النشاطات المتاحة هي أن تشرب شيئا ما كان من الممكن أن تشرب مثله وانت قاعد مستريح في بيتكم, و الكلام في مواضيع مالهاش لازمة غالبا لأنها هاتكون شكوى أو سب أو لعن شخص أو جهة ما.. صباح الإحباط يعني !!
لكن لو شلتك مالهاش وجهات نظر في الأحداث المحلية و العالمية هاتلاقيهم قاعدين يتابعوا مباراة الموسم ( إللي عمرك ما سمعت عنها غالبا !) أو – لو كانوا ضايعين- هاتلاقيهم بيتفرجوا على كليبات في قناة الأغاني.. و كلها حاجات كان ممكن تعملها في بيتكم أساسا من غير خروج و بهدلة...
لو كانت دماغهم عالية بقى هاتلاقيهم بيلعبوا بحماس غريب البطولة العالمية بتاعتهم و هي :
بطولة دورة الاستميشن : هاتلاقيهم قاعدين يلعبوا بالكوتشينة لعبة ( الاستميشن ) ذائعة السيط.. و لو كانت شلتك واقعة هاتلاقيهم بيلعبوا دومينو أو طاولة ومطلعين ورقة فيها قصة حياتهم مع الدومينو أو الطاولة وكل واحد كسب كام عشرة والدور الأخير واقف علي كام بوينت ومرحبا بك في مركز شباب الطاولة

لو كنت لعيب استميشن أو دومينو أو طاولةهاتتعامل.. لكن لو كنت مالكش من أصله , فهاتقعد و انت حاسس انك مالكش اي تلاته لازمة في القعدة دي , و هاتلعن اليوم اللي اتعرفت فيه على مدمني اللعب دول!



الخروجة التانية : كوفي شوب !
و طبعا زي ماحنا عارفين الكوفي شوب بيختلف عن قهوة الشمندورة اللي بتقعد عليها .. فيه شوية قهاوي بتكتب على اليافطة كوفي شوب على سبيل التضليل.. و فيه شباب بتلبس يا معلم و تروح داخلة.. لكن الكوفي شوب بيختلف كليا و جزئيا عن القهوة زي مانت عارف ..
الكوفي شوب الراقي بيكون فيه
(minimum charge)
زي ما سيادتك عارف.. عشان كده معظم صحابك مابيفضلوش يدفعوا 150 جنيه في قعدة إلا لو كان في في شلتكم – عدم المؤاخذة – بنات ! عشان المنظرة بقى و الحركات دي زي مانت فاهم ! الغريب إنك تلاقي الواحد منهم سالف منك خمسة جنيه و ذلّك عليهم.. و ييجي في قعدة يعمل فيها فييس و يروح رامي 300 جنيه على الطرابيزة ,حسابه و حساب المدام و ييجي عشرين جنيه بقشيش .. حاجة تغيظ يا جدع !!




الخروجة التالتة : نركب خيل !
دي خروجة بقى لو مبدأك في الحياة : ( أوديكي فين يا صحة ؟!) وطبعا غالبا لازم سيادتك تبقي من سكان القاهرة الكبري أو اطلع بحري بقي لو أنت من اسكندرية زي حالاتي
تطلع مع الشلة كده بعد نص الليل أو حتى قبل الفجر بشوية .. تنزل على نزلة السمان جنب الهرم و تروح لسايس خيل هناك تتفق معاه.. لو ماكنتش تعرفه يبقى هايضحك عليك و يدفعك زيادة بس مش مهم .. أهي خروجة و السلام!
يفتح لك الاسطبل و يخرج لك حصان تعيس يملأ العماص عينية و هو يسبك في قرارة نفسه لأنك اضطررته للاستيقاظ من هذه التعسيلة العميقة , لمجرد أن ترضي نزعة سادية بلهاء ألا و هي ركوب حصان بالليل .." إيه الهيافة دي ؟ عليّ النعمة لاوريك ! " و الكلام هنا للحصان في قرارة نفسه !
طبعا يجري الحصان في الظلام و أنت ترى ظل الأهرامات أو شروق الشمس حسب توقيت رحلتك.. و بما ن الحصان مستحلفلك فغالبا هاتقع من عليه أو هاتتسلت منك حاجه مهمة : الساعة – الموبايل – النظارة.... و آدي ديقني لو عرفت تلاقي حاجه منهم على رمل الصحراء في الظلام.. كان غيرك اشطر !
هاترجع بيتكم منهك القوي مكسر و عضلات رجليك بتوجعك ( مش عارف ليه .. هو الحصان اللي كان بيجري و لا انت؟؟


الخروجة الرابعة : النادي !
و دي أفضلهم بصراحة.. تروح تلعب لك دورين اسكواش مع الواد حمدي إللي كل مرة يغلبك و يحرجك قدامهم.. أو دور بنج بونج او تنس.. و بعدها تشربلك عصير برتقال مع البنت إللي بتحبها
وفي شلل غالبا بتروح النادي عشان تظبط بنات ولامؤاخذة وآهي قاعدة ترازي في خلق الله
و ينتهي اليوم..
فيه نوع تاني برضه من الشلل الرياضية .. إللي هم بيروحوا يأجروا ملعب يلعبوا فيه كرة قدم ( لازم يكون فيهم واحد بيلعب حافي ,مش عارف ليه !) لو مفيش نادي متاح... لكن المشكلة هنا هي إن الملعب إللي بتأجروه مابيكونش ملعب أساسا..أرضيته بتكون أسفلت أو طوب (يعني إللي هايقع هايتشلفط) أو أرضية تراب ( صباح العفرة ؟؟





الخروجة الخامسة : الأكل !
فيه ناس بتخرج عشان تاكل .. بس كده !
تكون لسه متغدي غدوة من الآخر.. و قاعد مأنتخ قدام التليفزيون و لا على بالك.. يعدي عليك الشباب و ياخدوك من حالة الصفاء الذهني اللي انت عايشها و بعد ماتنزل يقولولك : رايحين ناكل !!
تضطر تروح معاهم محل تيك أواي شهير و تطلبوا لكم كام سندويتش على كام فرايز على كام كباية حاجة ساقعة الصودا طايرة منها.. و تقعدوا تاكلوا و تتكلموا عن موضوع ما , و خلاص على كده!
هناك بعض الآراء التي ترجح أن الخروجة دي يجب أن تليها الخروجة رقم 1 بتاعة القهوة.. يعني تاكل لك الأكلة المتينة و بعد كده تطلع عالقهوة تحبس.. ماينفعش تطلع بعدها على كوفي شوب طبعا لأنه فيه أكل أساسا يا ذكي!




الخروجة السادسة : سواح و ماشي في البلاد سواح !
لازم واحد صاحبكم يكون معاه سيارة تعمل عمل التاكسي الخصوصي بتاع الشلة.. الصاحب ده بيكون الشوفير الخصوصي بتاع الشباب .. يعدي عليهم واحد واحد و يفضل سارح في الشوارع و معلي صوت الكاسيت على الآخر.. ممكن شريط (عمرو دياب) أو سي دي (بريتني) الجديد .. أو حتى أغنية ( البانجو مش بتاعي ) لو كنتم شباب فاهم الترويش غلط !
مشكلة الخروجة دي هي صاحب السيارة نفسه.. ممكن يكون طيب و ابن حلال و هنا مفيش مشكلة.. الازمة بقى انه يطلع ناصح.. هنا ممكن يدفع الشباب فلوس البنزين.. أو تطلع دماغة ناشفة و يروح الحتت إللي على مزاجه هو , و اللي مش عاجبه ينزل في نص الطريق غير مأسوف على شبابه !
الخروجة دي مالهاش لازمة لكن أهميتها إنها تغيير مناظر و خلاص...


الخروجة السابعة : ديسكو تيك !
دي لو كان مزاجك عالي و غاوي هز و مزيكا...
غالبا الديسكو تيك الكويس بيكون الدخول ليه
couples
عشان كده لازم تكون معاك بنت زي القمر عشان الناس اللي جوا متاكلش و شك..
فيه ديسكوهات تانية بتبقى ضاربها السلك.. يعني واقعة .. في الديسكو تيكات دي غالبا هايحصل خناقة و هاتنضرب, عشان حاولت تعاكس البنت اللي لابسه (بادي) ..و انت مش عارف ان الشاب (البادي بيلدينج) اللي واقف هناك ده مش بودي جارد, ده صاحبها يا فالح !




الخروجة الثامنة : التمشية والسرمحة
في حالة عدم وجود سيارة ممكن الشلة يفضلوا ماشيين في الشوارع كده و خلاص
وأحيانا تلاقيهم واقفين قدام مول ولا محل نضيف وقاعدين بيغلسوا علي اللي رايح واللي جاي
وياسلام بقي لو كان في بنت جميلة تحس أن كل واحد فيهم عايز يتشقلب قرد عشان يلفت انتباها
الخروجة دي زي ماحنا شايفين مالهاش لازمة إلا في حالة إنك تكون بتتمشى مع حبيبتك على البحر أو كوبري ستانلي .. و أحيانا جنينة الحيوانات برضه.. لكن موضوع الخروج مع حبيبتك أو حبيبك ده موضوع تاني خالص و له خروجات مختلفة تماما.. مش موضوعنا يعني ..


الخروجة التاسعة سنيما أو سيما بالبلدي
ودي طبعا غالبا مرتبطة بنزول فيلم جديد حضرتك مادخلتوش وكمان غالبا مرتبطة بالحالة المادية
من أول السينما بتاعة 3 أفلام ب10 جنيه لحد السينما بتاعة الفيلم الواحد أبو 30 جنيه
وكل واحد حسب السنيما اللي بيخشها


الخروجة العاشرة الدمـاغ
ودي للآسف منتشرة برضه جدا
والخروجة دي بقي لازم الشلة كلها تبقي أصحاب مزاج
حشيش .. بانجو .. بيرة .. بودرة ... كيمياء ممكن خمرة
المهم أن الشلة كلها يبقي لها كيف معين ودي نوعا ما مبتبقاش خروجة علي قد ماالمهم أنكوا لاتقوا مكنة
<<<< مكان يعني
نتتنيلوا تتلموا فيه عقبال ماتظبطوا الهيد أو الدماغ
وغالبا ما بتكون المُكنة شقة فاضية عند آي حد وياسلام لو كانت عربية
لزوم الترويش بعد ما الجي اتعدلت وعمرتوا الطاسة



هي دي الخروجات اللي بتتخرج اليومين دول... مفيش حاجة غير كده..
بس انا عامل الموضوع علشان اقول ان ده كله مش صح مش هقولك متخرجش لازم تخرج بس تكون مفيش فيها حاجة غلط تغضب الله سبحانه وتعالى ليه مترحش ندوات دينية او ثقافية او حتى علمية اكيد هتستفيد اكتر من الهلس اللى انت بتخرج فيه اسأل الله ان يهدينا جميعأ انشاء الله
منقووووووووووول
Go to the top of the page


+
الرجوع الى أعلى الصفحة اذهب الى الأسفل
Admin
Admin
Admin


المساهمات : 54
تاريخ التسجيل : 05/08/2007
العمر : 34

اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Empty
مُساهمةموضوع: رد: اكيد بتخرج مع الشله !!!!!!!!!!!!!!!!!!!!!!!!!!!!!!!!!!!   اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Icon_minitimeالثلاثاء أغسطس 07, 2007 3:45 am

موضوعك تحفة Very Happy
وربنا يهدينا
الرجوع الى أعلى الصفحة اذهب الى الأسفل
https://dala3.ahlamontada.com
Ahmed




المساهمات : 53
تاريخ التسجيل : 06/08/2007

اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Empty
مُساهمةموضوع: رد: اكيد بتخرج مع الشله !!!!!!!!!!!!!!!!!!!!!!!!!!!!!!!!!!!   اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Icon_minitimeالثلاثاء أغسطس 07, 2007 4:10 am

mawdo3 gameel awee ya mido

bas yareet te5tar el shella betatek ashan maykonosh byemeloo keda Very Happy


we yareet teroho Nadawat denya we thakafya zay ma otl

eshta ya basha

merciii ya Gamed
Smile Very Happy
الرجوع الى أعلى الصفحة اذهب الى الأسفل
M ! DO




المساهمات : 37
تاريخ التسجيل : 06/08/2007
العمر : 34

اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Empty
مُساهمةموضوع: رد: اكيد بتخرج مع الشله !!!!!!!!!!!!!!!!!!!!!!!!!!!!!!!!!!!   اكيد بتخرج مع الشله !!!!!!!!!!!!!!!!!!!!!!!!!!!!!!!!!!! Icon_minitimeالثلاثاء أغسطس 07, 2007 8:15 am

حاضر هابقى اروح ندوات دينيه وثقافيه
الرجوع الى أعلى الصفحة اذهب الى الأسفل
 
اكيد بتخرج مع الشله !!!!!!!!!!!!!!!!!!!!!!!!!!!!!!!!!!!
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
dala3.ahlamontada.com :: الفئة الأولى :: مواضيع الحب و الدردشة-
انتقل الى: